Då Mareano-forskarane undersøkte botnen vest av Tennholmen fyr i Bodø 22. mai 2021, dukka eit 100 meter langt vrak opp på skjermen.

Forskarane hadde allereie undersøkt dei detaljerte djupnekarta som dei brukar når dei planlegg kor havbotnen skal kartleggast med mellom anna video.





Dei hadde observert korallar i området, men akkurat desse strukturane skilte seg litt ut frå korallane som alt var kartlagt.

Dermed vart det bestemt at dette måtte dei undersøke nærare.





Då kameraet nærma seg strukturane, vart det fort klart at det var snakk om eit gammalt vrak. Store korallar tyda på at det hadde lagt der lenge.

Etter litt detektivarbeid om bord på forskingsfartøyet, blei det avslørt at det var D/S Malmberget som endeleg var funne.





43 menneske omkom då den svenske skuta forsvann nesten sporlaust i ein storm for over 100 år sidan. Fleire av dei omkomne var frå Narvik og området rundt.

Artikkelen er gjengitt med tillatelse fra Beate Hoddevik. Den ble først publisert på mareano.no.